गैरआवासीय नेपाली संघ कोभिड १९ तथ्यांकः अपडेट २३

२० सेप्टेम्वर २०२०

विश्वव्यापी महामारी कोरोना भाइरस (कोभिड १९) संक्रमणबाट विदेशमा विभिन्न मितिमा थप १ जना नेपालीको निधन भएको यो साता पुष्टि भएको छ । यो साता अमेरिकामा थप एक जनाको मृत्यु भएको गैरआवासीय नेपाली संघ अन्तर्गतको स्वास्थ्य समितिले उल्लेख गरेको छ ।

यो सँगै हिजो शनिवार साँझसम्म विदेशका विभिन्न १७ देशमा संक्रमणका कारण मृत्यु भएका नेपालीको संख्या २ सय ४४ पुगेको स्वास्थ्य समितिका संयोजक संजिव सापकोटाले बताउनुभयो । स्वास्थ्य समितिका अनुसार यो साता यूके, स्पेन र भारत, लगायतका देशमा कोरोना संक्रमणदर सामान्य रुपमा वृद्धि भएको छ भने ब्राजिल र युगाण्डामा पनि नयाँ संक्रमण देखा परेको छ । समितिका अनुसार हालसम्म विश्वका ४२ देशमा रहेका नेपालीहरु कोरोना भाइरसबाट संक्रमित भएका छन् ।

 

यस्तै विश्वभर १ लाख ८ सय ३१ जनामा नेपालीमा संक्रमण देखिएको छ भने ती मध्ये ७९ हजार ७ सय ८२ जना कोरोना मुक्त भएका छन् । नेपाल सहित कोरोना संक्रमणबाट मुक्त हुनेको संख्या औसत ७० दशमलव ५ प्रतिशत रहेको छ ।

 

 

६९ हजार २ सय ८९ जनाको उद्धार

कोरोना भाइरसको संक्रमणपछि भएको विश्वव्यापी लकडाउनका कारण विदेशमा अलपत्र परेका, आफन्तकोमा गएर उतै रोकिएका र अन्य विविध कारण स्वदेश फर्कन नपाएका नेपालीको उद्धार कार्य जारी छ । हालसम्म गैरआवासीय नेपाली संघ, नेपाल सरकारका विदेशस्थित दूतावास तथा नियोगहरुको संयुक्त पहलमा ३० देशमा रहेका ६९ हजार २ सय ८९ जनाको उद्धार गरिएको छ ।

गैरआवासीय नेपाली संघ अन्तर्राष्ट्रिय समन्वय परिषद्को दोस्रो विश्व स्वास्थ्य सम्मेलन जारी

शनिबार साँझ औपचारिक उद्घाटन भएको गैरआवासीय नेपाली संघ अन्तर्राष्ट्रिय समन्वय परिषद्को दोस्रो विश्व स्वास्थ्य सम्मेलन जारी छ । शुक्रबारदेखि नै अनौपचारिक रुपमा सुरु भएको सम्मेलनको औपचारिक उद्घाटन पूर्व स्वास्थ्यमन्त्री गगन थापा, गैरआवासीय नेपाली संघ (एनआरएन) का अध्यक्ष कुमार पन्त तथा राष्ट्रसंघका लागि नेपाली नियोगका स्थायी प्रतिनिधि अमृत राईले संयुक्त रुपमा गर्नु भएको हो । समितिका अध्यक्ष एवं सम्मेलन संयोजक संजिव सापकोटाले प्रथम विश्व स्वास्थ्य सम्मेलनको ऐतिहासिक महत्वलाई निरन्तरता दिन दोस्रो सम्मेलन तय गरिएको बताउनुभयो । सम्मेलनले संसार भरीका स्वास्थ्यकर्मी, उनीहरुको चुनौती र अवसर, युवाहरुको स्वास्थ्य, महामारीमा सञ्चारमाध्यमको भूमिका लगायत विषयमा अन्तरक्रियात्मक कार्यक्रम आयोजना गरिएको बताउनुभयो । सम्मेलनले जारी गर्ने घोषणा पत्रले स्वास्थ्य क्षेत्रमा निकै महत्वपूर्ण भूमिका खेल्ने विश्वास लिइएको छ । ३ दिने सम्मेलन विश्व नेपाली स्वास्थ्य घोषणा पत्र जारी गर्दै आइतबार सकिनेछ ।

एनआरएनएद्वारा कोरोनाका कारण समस्यामा परेका १ लाख ५० हजार गैरआवासीय नेपालीलाई सहयोग

गैर आवासीय नेपाली संघ (एनआरएनए) ले कोरोना महामारीका कारण समस्यामा परेका १ लाख ५० हजार गैरआवासीयलाई प्रत्यक्ष रुपमा सहयोग पुर्याएको छ । गैरआवासीय नेपाली संघ अन्तर्राष्ट्रिय समन्वय परिषदको दोस्रो विश्व स्वास्थ्य सम्मेलनको उद्घाटनसत्रमा बोल्दै संघका महासचिव डा हेमराज शर्माले कोरोना भाइरस संक्रमण सुरु हुने बित्तिकै एनआरएनका अध्यक्ष कुमार पन्तको संयोजकत्वमा उच्चस्तरीय कमिटी गठन गरी योेजनाबद्ध रुपमा अगाडी बढेको र समस्यामा परेका नेपालीलाई घरैमा पुगेर समेत सहयोग गरेको बताउनुभयो । डा शर्माका अनुसार करिब ५० देशमा २१ सय भोलेन्टियर्सहरु खटिएका छन् । एनआरएनएले कोरोनाका कारण समस्या परेका १ लाख ५० हजार गैरआवासीय प्रत्यक्ष सहयोग गरेको जनाएको छ । सहयोगमा स्वास्थ्य समाग्रीदेखि खाद्यान्नसम्म छ ।

गैरआवासीय नेपालीहरुबाट नै १२ करोड संकलन गरेर कोरोना रोकथाम तथा नियन्त्रणका लागि खर्चिइएको छ । एनआरएनएले नेपाल सरकारलाई पनि करिब २ करोड २० लाखको स्वास्थ्य सामग्री सहयोग गरिसकेको र सहयोग गर्ने क्रम जारी नै रहेको छ । ‘सुरुमा अर्वानेस्, प्रिभेन्सन र प्रोमोसनमा जोड दिएका थियौँ । पछिल्लो पटक थ्री आर (रिलिफ, रिपाट्रिएसन र रिह्याबिलिटेसन) को योजनाबद्ध रुपमा काम गरेका थियौँ । त्यो समयमा हाम्रो सचिवालय पुरै परिचालन थियो’ उहाँले भन्नुभयो ।

विश्वभरी छरिएर रहेका गैर आवासीय नेपालीहरुको अवस्था कस्तो छ भनेर बुझ्न आवश्यक रहेकाले विभिन्न ८२ वटा मुलुकमा रहेका नेशनल कोअर्डिनेशन काउन्सिल (एनसीसी) हरुसँग समन्वयन गरेर अगाडी बढेको उहाँले उल्लेख गर्नुभयो । कतार च्यारिटी र कतार रेडक्रसको कोलाब्रेसनमा करिब ७ हजार २ सय फुड प्याकेजहरु बाँडिएको महासचिव शर्माले बताउनु भयो । त्यस्तै एनआरएनएले आइएलओसँग एउटा प्रोजेक्ट सुरु गरेको जनाएको छ । आइएलओले पहिलो चरणमा ५ करोड उपलब्ध गराइसकेको र ५ करोड केही समयपछि दिने निश्चित भएको महासचिव शर्माले जानकारी दिनुभयो । यो प्रोजेक्ट खास गरेर मध्यपूर्वमा रहेका आप्रवासी श्रमिकहरुको लागि लञ्च गरिएको उहाँको भनाई छ ।

‘यो महामारीकाबीच खास गरेर नेपाल सरकारसँग पनि नजिक रहेर काम गर्ने अवसर मिल्यो , दुतावास, परराष्ट मन्त्रालय, राष्टिय योजना आयोग लगायतसँग नजिक रहेर काम गर्ने अवसर मिल्यो’ महासचिव डा।शर्मा भन्नुहुन्छ, ‘हामीले धेरै घचघच्याइ सकेपछि नेपालसरकारले मध्यपूर्वका केही मुलुकमा राहतका लागि करिब ७० लाख उपलब्ध गराइसकेको छ ।’ विभिन्न मुलुकका एनसीसी तथा काठमाडौंमा पनि २४ सै घण्टा हटलाईन सेवा सञ्चालन तथा उपलब्ध सबै प्रविधिको प्रयोगमार्फत गैर आवासीय नेपालीहरुको अवस्था बुझ्ने कोसिस गरिएको उहाँको भनाई थियो । स्वास्थ्य समितिका अध्यक्ष डाक्टर संजिव सापकोटा, कुश श्रेष्ठ लागयत अन्य मुलुकमा रहेका स्वास्थ्यकर्मीहरुको परामर्शअनुसार कोरोना रोकथाम तथा न्यूनीकरणका लागि एनआरएनएले सक्दो पहल गरेको उहाँले उल्लेख गर्नुभयो । ‘हामीले हरेक हप्ता के –के छ, गैर आवासीय नेपालीको अवस्था कुन देशमा कति संक्रमित भए मृत्यूको अबस्था के छ यसको जानकारीका लागि बुलेटिन र हरेक आइतबार विशेष बुलेटिन प्रकाशन गर्दै आएका छौँ । यो चाहिँ सरकार, दूतावास र सम्बन्धीत सबैका लागि निकै महत्वपूर्ण भयो । राष्ट्रिय मिडियाहरुले पनि प्राथमिकताका साथ स्थान दिनुभयो, डा शर्माले भन्नुभयो ।

तर एनआरएनएले नेपालीहरु स्वदेश फिर्तीमा महंगो भाडा लगायत विषयमा सरकारलाई पटक पटक घचघच्याउँदा पनि सरकारले त्यसमा बेवास्ता गरेको भन्दै महासचिव शर्माले दुःख व्यक्त गर्नुभयो । एनआरएनए अब पुर्नस्थापनाका कार्यक्रममा केन्द्रित हुने उल्लेख गरिएको छ । यसका लागि नेपाल र अन्य विभिन्न ४ मुलुकमा गरी ४५ जनाको समुह रहेको महासचिव शर्माले बताउनुभयो । युके एकेडेमिक टिमसँग मिलेर नेपालमा फर्किएका गैरआवासीय नेपालीहरुसँग कस्तो सीप छ भनेर तथ्यांक संकलन गर्न समेत सुरु गरिएको उहाँले जानकारी दिनुभयो ।

तथ्यांक संकलनपछि उहाँहरुलाई रोजगारदातासँग कसरी जोड्ने भन्ने योजना तयार गर्ने महासचिव शर्माको भनाई छ । त्यस्तै एनआरएनले अक्टोबर ९ देखि ११ सम्म दोस्रो विश्व ज्ञान सम्मेलन समेत आयोजना गर्ने उहाँले जानकारी दिनुभयो ।

‘कोभिड १९’ उच्चस्तरीय समिति

गैरआवासीय नेपाली संघ,